中大研究院噚日舉行畢業禮，其中修讀教育碩士兩名畢業生身份顯赫，重吸引到教統局局長李國章嚟排隊影相同支持。佢哋就係教統局常任秘書長羅范椒芬同扶貧委員會秘書長謝凌潔貞。不過兩個人喺畢業禮名單上都無用夫姓，唔好眼都搵唔到佢哋個大名。
雖然羅太成日忙住搞教改、課改，但係都完成到碩士，佢老師重大讚佢上課足、交功課足，成績優秀，重有機會成為嘉許嘅學生名單！戴上四方帽嘅羅太，噚日開心到四萬咁口不停笑，周圍同人影相，喺研究院院長黃永成手上接過證書時，重好含羞㖭！唔知係咪因為羅生、羅太嘅哥哥同亞瑟王（即李國章）都嚟咗支持，有啲怕醜呢？
羅太話讀完書好開心，但係暫時唔會讀教育博士住。佢覺得所學嘅教育課程好理論，希望有機會實踐，到學校幫吓手㖭。
至於嚟撐場嘅亞瑟王，被問及有中一學校被殺嘅問題，佢就話希望有機會接觸開得少班嘅中一學校，或者需要佢哋整合，亦會接觸辦學團體傾吓喎。
爆料熱線：29290000、27860099
報料傳真：26239278
報料電郵：[email protected]