湖南（湘）同湖北（鄂）俾洞庭湖分隔開，令到兩地嘅菜式南轅北轍。雖然不致各走極端，但係湘菜就比較野性，而鄂菜就較溫淳，部份菜式亦較濕潤，但共通點都係偏重鹹辣味。𠵱家想試正宗嘅湘、鄂菜，唔使特登返大陸，因為國內出名嘅湘鄂菜館已經登陸香港！
記者：梁學文
攝影：伍慶泉
Model：Judy、Yuki（thegroup）
惹味三椒
白蒜椒
係一款曬乾咗嘅辣椒，唔係好辣，用來炒臘肉同煮魚，味道一流。
醬椒
辣椒用醬醃過，味道變得酸辣，用來炒菜同蒸魚頭最啱。
酸豆角
酸豆角味帶酸，非常醒胃，多數會用來炒肉碎。
鄂菜：香、鹹、鮮
鄂菜喺香港好少有得食，小記對上一次食到鄂菜，都係喺湖北。湖北天氣較乾燥，鄂菜就以蒸、臘、燒為主要煮法，以保持食物濕度。食物油份會較多，而且醬汁較濃，可以喺乾燥天時滋潤吓！鄂菜味道香、鹹、鮮，臘肉就最能體驗鄂菜特色。鄂菜嘅臘肉跟湘菜唔同，湘菜用煙熏，鄂菜就會用風乾，所以臘肉本身嘅味道會較重。
最鹹濕：滋補醬豬手$18/隻
鄂菜嘅豬手較湘菜濕，醬汁亦比較多。師傅先用水煮然後炸，再用滷水滷同燜豬手8個鐘就完成，工序多味道當然豐富。滋補醬加入咗小紅棗，可以補氣活血。
風乾武昌魚$98
毛澤東曾經講過：「才飲長江水，又食武昌魚」，鄂菜嘅做法係先用滷水滷，再風乾，然後再用豆豉辣椒醬煮。魚肉入口鮮味，雖有好多辣椒，但係一點都唔辣，反而重惹味。
泥嵩炒臘肉$68
湖北人會喺洞庭湖採摘野生嘅泥嵩做菜，配合臘肉，集香、鹹、鮮於一身，味跟湖南嘅酸菜形成強烈對比。
湘菜：酸、辣、鹹
有句老話：「四川人不怕辣，江西人辣不怕，湖南人怕不辣。」因為湖南氣候潮濕，食酸辣味道嘅菜會較開胃，而且當地冬天極之寒冷，所以當地人會貯定糧，而保存食物嘅最佳方法除咗快啲食落肚之外，就係醃製同曬乾，到煮嘅時候先至加辣椒等醬料去炒。所以湘菜嘅做法主要係炒、熏、鍋，而味道就係酸、辣、鹹。
玉書東坡肘$68
賣相同做法都係差唔多，唔知德國鹹豬手係咪抄呢款東坡肘呢？除咗皮香之外，點埋個酸辣汁，放入口慢慢刺激每粒味蕾，然後吸一口氣，讓香氣喺鼻腔入面游走。
出奇唔辣：剁椒魚頭$108
用洞庭湖大頭魚做，較為港人熟悉。最特別係用魚尾部份做新鮮魚丸，跟一般嘅魚蛋唔同，味道較鮮。
酸得地道：酸包菜粉皮$48
湖南家家戶戶都會自己醃菜，佢哋嘅醃菜味道帶酸，食時先拿出來煮。呢度嘅酸菜就由湖南入口，當然地道。
記者推介：估唔到咁好食
八臘豆臭豆腐$22/半打
不可不試試湖南嘅臭豆腐，雖然賣相似嚿炭，但係一放入口臭氣全消，換來係香滑嘅口感。
食客兩句
湘鄂情（68854428）
地址：佐敦長樂街18號18廣場1-2樓
座位：316個
營業時間：11:00am-11:00pm
雲南舖賣湖南菜
唔好一聽雲南米線就以為得雲南菜，其實老闆三哥係湖南人，一樣有湖南特色米線食。湖南米線嘅酸辣湯底係用湖南泡菜水做，泡菜水即係湖南人水醃蔬菜嘅水，味道較清，而且唔似醋，因為落得太多會嗆喉。
湖南土匪雞翼$20
呢款雞翼真係由湖南土匪發明，三哥加以改良，用42種香料醃製，必叫！
湖南酸辣米線$16起
酸辣湯湯底用4種骨熬成，再加入辣椒同泡菜水而成，味道清甜，酸而不搶！
譚仔記雲南米線（23945622）
地址：大角嘴大全街24號地下
營業時間：10:30am-10:00pm
