呀肥平喺民政局下面偷偷地搞咗個文化三合會，分別要嚟睇吓香港啲博物館圖書館同表演藝術未來點樣，呢個三合會開會開咗好耐，都係開會囉，查實係阿WK（林煥光）做民政局局長已經搵呀城大校長HK主持咗個文委會，之後已經出咗份報告，就要慢慢將𠵱家官府康文署控制嘅文化場地同文化資源下放畀民間搞文化，文化界都好支持，等以後香港文化明天更好。
叫好叫座都冇碇排戲
點知阿肥何上場，當份建議書隱形，又唔同文化界交代，自己偷偷地搞咗個文化三合會，佢唔知係咪怕咗康文署個啲官，又或者係佢要做香港文化沙皇，又或者係做文化老頂，肥平可能喺醫眼界係有講嘢地位，但文化界就真係有排，好似文化三合會之一嘅表演藝術委員會，最近就出咗份建議，咪又係要嚟保護嗰幾個超級大國囉，最搞笑就係裏面竟然唔將粵劇同中國傳統戲曲當為表演藝術一部份。
中國藝術裏面傳統戲曲係最有特色，好似崑曲已經俾聯合國列為世界非物質文化遺產，好巴閉㗎，而崑曲演變出嚟嘅粵劇更加係最代表到香港藝術嘅劇種，好似上個月阿仙姐出山搞戲，爆到七彩，叫好又叫座，但係好似仙姐咁有江湖地位嘅，政府都畀唔到固定地方排戲，要走嚟走去，康文署要好似口偽契爺咁口偽先畀嗰兩個禮拜，人哋啲鬼佬搞百老滙歌劇就可以租成六個月，香港人就冇呢支歌仔唱。
唔搞好康文署冇得做
呢份表演藝術委員會嘅報告咪一味要再支持個啲管弦樂團呀，喺阿肥何眼中，咪得鬼佬管弦樂係藝術，其他就唔係藝術囉，其實一日唔改好康文署，香港文化藝術咪使旨意可以有得發展，新加坡呢幾年係有進步㗎，佢哋啲圖書館同博物館都有啲睇頭，學晒歐美同澳洲啲老嘢。
唔使講第二啲，開放時間已經好過香港康文署好多，康文署啲場地，市民哋要返工嗰陣佢就開門，市民哋放工有時間嗰陣佢就閂門。