陳太一出，政壇從此多事。手袋黨重出江湖傳聞，一時間甚囂塵上。八方四圍探聽，發現手袋黨近日確係有異動，喺加拿大嘅「契媽」李麗娟、喺英國嘅林鄭月娥、喺美國嘅韋玉儀都已經飛返香港，重同「鐵蝴蝶」任關佩英、「D姐」俞宗怡一齊喺灣仔銅鑼灣等地頻頻出沒，至於有冇同身在祖家嘅四萬姨越洋通聲氣，就暫時未查到。
咁多個手袋黨大將喺呢個敏感時刻一齊在港聚頭，咁煲呔肥龍咪好驚？非也非也，呢班高級娘子軍，冇錯係返嚟齊心合力做件大事，但一定唔係謀朝篡位，只係幫手搞好世貿會議等特區唔好失禮人啫。
任關佩英話自己冇企圖
嗱，成件事係咁嘅。話說唐英年當年口輕輕應承辦世貿大會，點知佢自己升咗官去做財神，呢攤蘇州屎留咗畀鬍鬚仔曾俊華清理。咁D姐身為工商局常秘，係曾局長左右手，冇理由唔一力承擔。但佢明知呢場仗唔易打，早幾個月已吹雞班馬，咁D姐叫到，手袋黨自然一呼百應。
好似契媽咁，佢本來去咗加拿大探八十九歲阿媽，但為咗WTO，今個禮拜已經歸來，噚日下晝重去咗WTO會場踩吓線，聽講佢會主力負責接待兩場NGO會議。至於林鄭，最近一次見佢係煲呔訪問倫敦，佢喺彼邦負責安排。當時佢已經話咗會返港，大家重以為佢會上京接替梁寶榮或者替阿契媽，查實又係應D姐呼籲，幫手搞MC6。而喺美國嘅韋玉儀，佢係特區駐華府經貿專員，早前重喺華盛頓猛話煲呔喺美國好受歡迎，家吓都返咗嚟，噚日亦在會場出現。
至於前環境食物局局長任關，佢一直在港，12.4重着埋黑衫去遊行。八方聽聞，佢着黑衫除咗響應大會呼籲外，亦因為有孝在身，要悼念母親。咁任關有冇政治野心呢？佢就話「現時嘅生活非常開心」，冇乜企圖，只係想香港好。
其實走上街頭表達意向，同留喺建制默默耕耘，有心嘅人都係想香港好啫。手袋黨又好、煲呔黨又好，邊個真心幫香港人做事，市民眼睛係雪亮嘅。
爆料熱線：29290000、27860099
報料傳真：26239278
報料電郵：[email protected]