老牌大作《MetalGear》，相信無人不識，尤其最新PS3大作《MG4》發布後，超靚畫質加Snake變老蛇嘅Gimmick，更搶盡機迷注意力；《MG4》重要好一排先有得打，心急者PSP本周有一隻《MetalGearAC!D2》推出俾大家「止咳」！首隻PSP「蛇Game」，再加卡Game玩法，絕對創新，加上畫面音效都有極高水準，更令Game迷不可不玩，不過最過癮都要數到跟埋嘅TOBIDAC!DSOLIDEYE立體眼鏡，立體「硬蛇」相信大家未見過吧！
記者、攝影：許福合
ImageGirl：Kennis
筆者自身都係一個死硬派「蛇」迷，起初接手呢隻《MGA2》時，相信都有同大家一個諗法：「動作Game變成卡Game，一定又慢又冇癮！」，直至正式開包試玩，發現原來每張卡代表了一個攻擊或隱藏指令，一卡一動作，感覺同動作版「硬蛇」真係有異曲同工之妙，更重要是PSP要隨街揸住打，免卻好多環境因素影響，引致輸入錯誤「動作」嘅勞氣，真係諗得非常周到！另外喺度提醒各位準買家，買Game時記得要留起包裝，行貨膠套會有編號，喺嚟緊月中推出嘅《MetalGearSolid3Subsistence》，揸住佢隨時有機會獲得額外紀念品！
立體眼鏡睇到眼花
今次《MGA2》除咗可以喺下次買Game有着數外，首批行貨重會跟個搞鬼TOBIDAC!DSOLIDEYE立體眼鏡，以硬卡紙作為物料，所以要先摺好佢，包裝上有提示，不過英文指示似乎寫得唔係咁清楚，筆者就搞咗好耐先摺到成形！完成之後就重好笑，相信未見過呢個眼鏡嘅人，第一個直覺都會係立即戴上頭，其實眼鏡係用來套在PSP上，玩嘅時候就伸個頭埋去睇。
至於效果，主要係將原本2D畫面變成3D顯示，不要期望可以見到子彈橫飛嘅場面，感覺係畫面變得有少許「深度」！但要好似睇迪士尼立體影院咁正？當然係冇可能啦！基本立體眼鏡只屬玩票性質，而且睇得耐包你有頭暈眼花之感，加上成日要伸個頭埋部機度，長時間打機都頗為辛苦。
500種卡片玩法多花臣
玩慣《MG》系列機迷，對新作最感不同之處，首數都係卡片制；遊戲內會出現超過500種唔同功能同用途嘅卡片，基本上每開始一個新Game，電腦都會隨機列出一套卡嘅陣容，所以每次遊戲都要因應獲得卡種類而定出用卡先後次序，最基本要先用嘅係避彈衣同武器，另外如果抽到圖示係望遠鏡嘅卡片，提議先裝上，因為可令你攻擊距離大增，用來偷襲就非常易得手！卡片遊戲當然對出卡有規限，《MGA2》會有一個Cost系統，每次使用卡，Cost都會增加，當數值超過時，玩家移動速度會大幅降低或甚至不能移動，而能力愈強嘅卡種，所佔用Cost數就愈高，戰略要將Cost考慮在內！另外，還有一種好用嘅特別卡，當合乎卡發動條件，就會自動發揮其效能，如補卡或增加攻擊次數等，係王牌卡之一。
回合制活用戰略
除咗採用卡片，PSP版更係使用回合制，再唔係走埋去偷襲冒險嘅玩法，每次開始一個新回合，就會列出過關條件，初期任務比較簡單，都係以通過關卡為目標，由於今次玩家唔可以自由行動，當決定路線時，好應先來個大地圖鳥覽，先定敵人位置，決定前進路線嘅同時，亦要選擇係咪要清除敵人，要注意敵人面向嘅方向，如果走到敵人背面，基本上係唔會被發現，呢個時候就可以選擇擁有嘅武器或出卡攻擊。
新手初玩時，最好先通過教學，操作上以十字掣為主，Joystick只係轉換視點之用，以右邊4粒掣作出卡等各種行動，經過教學後比較易上手！隨着遊戲進行，將會有女角登場，符合條件就可以喺角色間轉換操作，如敵人於兩名角色之間，一個攻擊，另一個就會醒目地作掩護！同好多PSP遊戲一樣，《MetalGearAC!D2》都可以無線對戰，不過又係1on1式單挑，無咩新鮮感，尤其以卡片形式玩法，無線對戰可玩性就只係一般。
機迷試玩
卡片制好特別
Sammy：玩得多《MG》，今次轉玩卡Game，發覺比想像中有趣，淨係開牌一刻已夠緊張。
3D眼鏡勁過癮
Kennis：多個立體眼鏡，畫面變得好得意，不過玩一陣覺得有啲眼花。
遊戲資料
主機：PSP
開發：KONAMI
類型：SLG
遊戲人數：1人
售價：$299
查詢：龍勇（22468113）
