英皇旗下嘅澤星（國際）娛樂有限公司，旗下藝人包括擁有36G驕人上圍嘅新一代性感女神雷凱欣，重有黃榕，男藝人就有譚耀文、黎耀祥同DJ劉偉恆。但因為澤星受市道不景氣影響，要節省資源，所以噚日澤星已經正式同英皇藝人發展部合併，澤星嘅藝人大部分被自然遣散。
祥仔樂得輕鬆
馮仁昭聽聞除咗譚耀文有得留低、轉交畀經理人霍汶希（Mani）照顧之外，其餘四位藝人已先後解約。馮仁昭噚日同雷凱欣傾開，佢就話自己反應平淡，又話近排有唔少公司斟佢簽約，𠵱家就拍緊王晶執導嘅新片。其實王晶都有問過佢有冇興趣行性感殺入影圈，但佢就打算等到過埋年、諗清諗楚先再決定。
至於黎耀祥近年主力拍無綫劇，解約事件對佢影響唔大。祥仔話自己同Mani管理開嘅偶像歌手唔同市場，夾硬合作亦無謂，佢重抵死咁話：「我去公司周年聚會都尷尬啦，都係口靚妹口靚仔、Twins、Boy'Z，叫我祥叔咩？」祥仔話想享受吓「單身」生活，所以暫時唔考慮再簽經理人。
