麗新發展（488）昨日果然勁抽，最高見過0.164元，收0.154元，升12.41％，成交股數2.04億股，金額3176萬元。經紀陳話，如果港股唔係受日股影響勁跌255點，隻股分分鐘炒得重高。
經紀陳又話，噚日日股跌得有啲無厘頭，有間行造錯盤，唔排除今日會有反彈。
今日焦點估計仍然係IPO，因有3隻新股同時掛牌，包括西王糖業（2088）、中國香精香料（3318）同埋羅欣藥業（8058），其中受惠於近期新股熱潮，公開招股超購200倍的西王糖業，未上市已聞到極濃炒味。
羅欣可以敲冷門
經紀陳話，雖然西王受追捧，但只以中間價1.88元定價，據講係想接貨者有水位賺錢。不過，隻股hit得咁緊要，街貨多咗好多，會唔會有影響實好難講。
至於創業板股羅欣，就比較少人講，原因可能佢係創業板股，但經紀陳話唔使替人擔心，聽講有關人等一早搞掂晒。
慕容小初