梁榮忠早前偷情事件變咗城中熱話，無綫為咗食住個勢，搵咗忠仔拍劇集《非常外母戇姑爺》，扮演一個大滾友。噚日《非》劇一班演員喺將軍澳電視廣播城拜神，忠仔好盡力咁解釋話：「唔好對號入座，唔好成日諗番以前。」
再被無綫擺上枱
而無綫新節目《笑口常開》嘅宣傳片又擺咗忠仔上枱，忠仔好無奈咁話：「我冇睇過呢個宣傳片，唔關我事。」其間，忠仔不停叫大家放過佢，又叫大家將焦點放喺佢嘅工作度。不過事實歸事實，避而不談件事，又叫人放過佢，都唔係上策。
反觀忠仔女友鍾麗淇噚日幫老闆娘黃佩霞宣傳瑜伽時，全程表現大方，鍾麗淇話：「一個人做錯嘢，想報答、補償係佢嘅問題，發生啲咁嘅事，都冇必要喊苦喊忽，我個人好勝，時間可以證明一切，不過我有樣嘢要澄清，令我最嬲就係我媽咪唔係七十歲，而係五十歲。」
另外，鄭裕玲噚日接受商台訪問，提到忠仔偷情事件，嘟嘟話台慶祝酒時同忠仔講，叫佢唔好再講對唔住、唔好再跪地，聽日係新開始。
