位於西灣河嘅港島高爾夫球會噚日正式開幕，老闆係楊超成、施榮恆、譚浩瀚同陳偉倫，名人富豪都畀面出席，好似彤叔、四姨太梁安琪同班明星歌星一齊主持開幕禮，令西灣河呢個舊區異常熱鬧。
個高爾夫球練習場佔地二十二萬方呎，有四層共一百一十二個發球道，面對維多利亞港海景。老闆楊超成話個場投資咗幾千萬，股權由四個股東平均攤分，估計三年幾就可以回本，因為𠵱家全港共有十幾二十個高球練習場，但位處香港島連埋呢個新嘅都係得兩個；而全港估計有二三十萬人玩高爾夫球，當中一半係住喺港島，所以佢咁有信心。而且佢哋聘得全港女子高爾夫球冠軍、前港姐鄭文雅為駐場教練，又幾吸引。
爆料熱線：29290000、27860099
報料傳真：26239278
報料電郵：[email protected]