國民黨榮譽主席連戰噚日同滙豐亞太區主席鄭海泉一齊，獲煲呔曾頒授中大榮譽博士學位。連戰話，佢上次嚟香港已經係三十八年前，香港成個局面都好唔同，今次非常榮幸攞到個學位，由呢刻起佢就係中大校友，佢會秉承中大嘅精神，致力推動兩岸交流，不過佢就唔評論係咪支持香港人爭取民主，但話晒台灣都搞民主，點都好應該支持吓香港。
連戰成家人都有嚟中大捧佢場。八方讀中大篇連戰介紹，讚佢過往好多政績，數十年從政生涯「愈戰愈勇」。但台灣總統選舉，連戰就連輸兩鋪，第一鋪重輸得好難睇，你話人從政「愈戰愈勇」，聽落真係好似潤緊人咁，呢鋪真係擦鞋擦過龍。
鄭大班就話，佢好開心，因為呢個係好高嘅榮譽，佢未來會繼續努力服務社會！至於政改係咪要有時間表，鄭大班話，佢𠵱家係代表滙豐，所以就唔方便發表個人意見啦！
鄭大班嘅家人噚日都嚟咗中大。鄭太話，佢哋前兩日先至從斯里蘭卡公幹返港，佢都係第一次去斯理蘭卡，嗰度嘅經濟畀佢想像中蓬勃，老公開會嘅時候，佢就去當地由滙豐開嘅中心做義工，幫吓啲聾啞人士，至於點樣同老公慶祝，就等慶祝完先同八方講啦！
除咗鄭大班同連戰，今次獲中大頒學位嘅，重有中大前校長金耀基、海協會主席汪道涵（佢因病嚟唔到）、台灣嘅人類學家李亦園及九三年諾貝爾醫學獎得主RichardRoberts。
爆料熱線：29290000、27860099
報料傳真：26239278
報料電郵：[email protected]
