LV喺置地廣場嘅旗艦店嘅裝修終於完工，噚日朝早喺文華開記者會，晚上就請大長今李英愛嚟剪綵，今日會先招待VIP，到周六就正式營業。旗艦店最搶眼梗係高12米長40米嘅玻璃幕牆，中環人行過都忍唔住要望多兩眼。
記者參觀團由LV一眾高層親自帶隊，由於有60幾個來自中、台、韓、日、馬、印尼及澳洲嘅海外記者，加埋本地行家，差不多成百人，由文華行到置地嗰幾分鐘腳程，就因為人多勢眾，口音又雜，搞到好似國際自由行咁，都咪話唔矚目。
帶頭嘅LV主席兼行政總裁YvesCarcelle、日籍設計建築師青木淳及董事總經理SergeBrunschwig（圖左至右）為令記者影到旗艦店，特登走到對面馬路擺pose，一眾攝記惟有照跟，一班人喺馬路邊愈企愈出，華華睇見都牙煙！
LV亞太區傳訊總裁郝黃嘉莉同華華講，香港旗艦大樓喺全球僅次於紐約及日本，本來只係細舖，等咗年幾兩年逐步併埋隔離左右，為咗唔影響人，裝修都喺晚黑進行。都算用心良苦！