吳日言三年前買了迷你史納莎WinWin，她付出金錢和時間照顧愛犬，所以決意訓練WinWin表演跨欄、扮死和請請等高難度動作，這樣WinWin才不算白食白住。
吳日言（Yan）讀中七時，在生日那天獨自逛街，發現有大群人圍觀寵物店，在好奇心驅使下，阿Yan上前一看，即被櫥窗內的一群史納莎BB吸引，更毫不考慮地花四千多元買了迷你史納莎WinWin。
養狗先斬後奏
由於阿Yan怕家人反對她養狗，便編了一個大話，阿Yan說：「我帶阿Win返去可以話係先斬後奏，初時呃阿爸話WinWin係朋友啲狗生嘅BB，帶佢返嚟玩幾日，過咗好多日，阿爸都冇問我幾時帶阿Win走，因為佢都好鍾意阿Win。」阿Yan覺得她付出金錢與時間照顧愛犬，所以WinWin一定要有一些表演技能娛樂她，阿Yan笑說：「我花得錢養佢，佢就唔可以白食白住，佢一定要識表演畀我睇，咁我咪開始訓練佢做動作囉，𠵱家佢已經識得企起身行、扮死、跳圈、轉圈、請請等動作。」
雖然WinWin深得阿Yan歡心，不過阿Yan都會狠狠地懲罰牠，阿Yan說：「佢有個癖好係鍾意咬鞋盒，有一日我返到屋企見一地都係鞋，當我執執吓嘅時候發現佢咬花咗我一對三千幾蚊嘅鞋，嗰刻我好嬲，咪係咁鬧佢。」
改善父女關係
此外，阿Yan表示WinWin已變成她與父親之間的橋樑，她說：「未養WinWin之前，我同爸爸冇乜嘢講，養咗狗之後，我哋多咗話題，爸爸錫WinWin重多過錫我㖭！」
採訪：李珮洳 攝影：陳偉權
