港股連續3日，大上大落，恒指噚日又大跌255點，20日線（14940）亦跌穿，形勢轉壞。
噚日港股嘅跌勢係因日股大跌所觸發，日股大幅上升後，到噚日急跌，乃係正常嘅獲利回吐調整，但港股照跟，好明顯係有人要造淡，趁機推低個市。
大市波幅咁大，其實大戶都係攞住幾隻大藍籌推上推落，今日將佢哋掟落去，話唔定第日又會掃番上去，冇路可捉，跟無可跟，短線走勢真係好難估，但中長線仍可看好。
收市後同班芬佬吹水，講到後市，佢哋都係偏向樂觀一便，瑞銀明年睇恒指見17900，太長遠，就講呢個月，早前有話過可見16000嘅，睇法冇變。恒指若能守得住在50日線（14778）之上，唔使太悲觀。
大市大幅波動，市場氣氛無疑會受影響，但近期二三線股個別發展之勢，已愈來愈明顯。就以噚日為例，上升股（不計認股證）重有成244隻。大戶刻意質低幾隻大藍籌，會否買其他股票呢？
私有化概念強
石化股繼續有強勢表現，中石化（386）同中石油（857）大升之後，噚日都只係回軟一兩個位；下游嘅、有機會私有化嘅重逆市而升，儀征化纖（1033）升5仙、上海石化（338）升10仙、中石化冠德（934）升4仙，以及中油（135）升4仙。
中石化現時正私有化鎮海煉化（1128），明年首季，其他子公司亦會擺上日程。冠德現時股價仍低於每股資產淨值1.52元，而盈利又有穩定表現，若私有化，相信作價應該在2元過外。
最近3隻石化股私有化，作價都遠比資產淨值為高，北京燕化有溢價62%、吉林化工（368）有105%、鎮化更有144%。保守估計，冠德私有化作價有溢價60%，每股已達2.40元，比現時股價超出66%！
中石化持有冠德72.34%，街貨27.66%，只值4.1億元，中石化私有冠德，最慳力，唔排除鎮化之後就輪到佢。
冠德本月初大升後，形成上升三角形，噚日高收，今日若破1.45元阻力，升勢又可確認，照度上去，短期目標係1.70元。
郭兆誠