下晝開市冇耐，個市有啲似倒水，恒指跌過273點，埋單跌255點，低位回升都唔係好多。
下晝跌市，受日股回落301點拖累。日本嗰便嘅言論，係日股升得太多，過晒頭。又係嘅，日股𠵱家較1年前大升39%，較年初大升32%。睇吓恒指，較1年前只升6%，較年初只升5%。由相對變化睇嚟，港股唔係高危。
但每日嘅變化，都非常難捉。例如中移動（941）前日升0.55元，昨日跌1.55元，咁就拖低恒指98點。
中銀C輪4644：紅色銀行中，交銀（3328）升3格，建行（939）升1格，中銀（2388）則跌兩格，收14.45元。
中銀唔係水蟹，10月低位14.15元，昨日最低14.25元，估計已見底，C輪博得過。兩隻可揀，1係4644，1係9068。正股每變動0.15元，4644理論變動16%。而9068則變動14%，4644交投金額則細過9068。
中移動C輪9471：博中移動反彈，搵C輪博反彈，唔想太刺激，可向9471埋手。隻輪明年3月中前夠鐘，溢價4.9%，槓桿率11.3倍（有效7.4倍），引伸波幅31.1%。贏輸完全由班對沖佬話事，舞高弄低，唔易估中。
章盛