領匯雖然上咗市，但風波仍不斷。繼「孩子王」惹起狙擊疑雲後，又爆出主席鄭明訓係德銀顧問，而德銀做咗領匯第二大股東。雖然財經界中人都明白德銀啲芬佬買貨唔會問過鄭顧問，但有王冬勝一入滙豐馬上辭任領匯主席以避嫌之先例，呢啲可能有利益衝突嘅問題早應正視。
新事物出台，有啲問題唔出奇，但千祈唔好擾民，否則重叫乜嘢金融中心？有個領匯小股東，用白表申請，配到幾手，收到股票之後攞去賣，賺咗一餐飯本來好開心，點知T+2交收之後都收唔到錢，一問始知要等股票過晒戶轉咗名，3個禮拜先有錢收。點解？原來係怕有人用舊年收到之領匯股票去博懵，所以必須驗明正身喎。
咁又係，舊年啲領匯寄出晒，雖然已係廢紙一張，但印刷精美又有晒名，好難話佢假。睇嚟有關方面要每間經紀行都送一份新一份舊股票去，方便佢哋辨認，咪收錯一張，引起假股票風波就大件事。
李華華