執筆之時剛度過黑色24小時，周三晚同大行老友入跑馬地睇國際騎師賽，兩個人信心十足捧蘇銘倫場，結果食白果兼輸到反艇，返到屋企條氣唔順上網買波，歐冠盃落注買曼聯贏，開場無耐見史高斯為曼聯射入1球，條氣順番好多尋美夢去，點知起身睇賽果，曼聯居然倒輸1:2畀賓菲加，趙飛雲當時即刻打咗個「突」，因為啲衰嘢通常係一不離二，二不離三。
昨日睡眼惺忪上到股票行，坐咗冇耐終於出現近期最擔心的事。日股早市升上15520受阻但走勢尚穩，但午市重開（香港時間11:30）後不久即上演笨豬跳，搞到港股亦出現雞飛狗走的場面。
日股最後以全日低位15183收市，大跌301點，港股午市重開後自然亦被淡友踏多兩腳，其後好友雖努力反撲，但恒指最終仍大跌255點，收14879。
恒指本周截至昨日為止下跌321點，看來今日是無力挽乾坤作第6周上升。更甚者，若恒指今日未能重返20周線14938之上收市，下周的波動區，將下移至14940-14400水平。
今日宜守14940收市
由日線圖看，則可較精細推敲未來幾日走勢。恒指昨跌穿20日線收市，技術有轉淡迹象，但未確認跌穿50日線14780水平前，則仍屬健康調整，毋須睇得太淡，特別日股大跌傳因錯盤事件，今日或有反彈。
上周提過和黃（013）不宜跌穿73.60元升軌支持，昨日和黃走勢甚差，開市不久已在73.60元上下徘徊，日股插水，要追至73.30元才沽出，雖不致白做，但亦較高位跌去近8成帳面利潤。
趙飛雲