大部份人都唔知佢傾乜嘅世貿會議，下星期就要喺香港開會，政府噚日向有報名採訪嘅記者派發「百寶袋」，當中包括一條領巾，啱晒咁凍嘅天氣用，萬一有催淚彈甚或毒氣，重可以用嚟包住個頭頂一陣；另外重有旅發局畀旅客嘅宣傳刊物，同衞生署嘅《防備流感大流行錦囊》，睇嚟「百寶袋」都會送畀嚟開會嘅各國來賓。
呢亭WorldTalkOrganization嘅口水會，好難有結果，唐英年當年口輕輕應承接辦，其實真係勞民傷財，香港地方咁細，又安排個會喺市中心舉行，有乜事一定癱瘓香港島，紅隧亦唔使行，所以有人話要搞都去大嶼山搞，包咗迪士尼兩間酒店，點示威法都對市民生活冇影響，話唔定美國佬同歐盟見到米奇同獅子王好開心，肯讓步㖭。
貿發局用錯地圖
勞民傷財之外，公務員都好煩，警察叔叔唔使講，有好多高官，未來呢個禮拜都唔使瞓，八方聽聞，政府都好體貼，出錢買咗啲摺床，畀佢哋放喺辦公室，夜晚得閒瞌瞌，不過睡袋就要閣下自備喇。至於曾俊華就有酒店房住，咁又係，佢係主人家，要招呼百幾個國家嘅部長，又要談判，冇理由要佢瞓帆布床啫。（開完會佢不妨試吓，等啲下屬條氣順啲。）
而灣仔一帶做生意嘅，就一係大覺瞓一係瞓唔着，八方早幾日去東海飲茶，阿部長話嘅客都取消晒booking。新鴻基大廈又圍起晒，海都亦唔使做；鷹君中心下面商場啲舖，例如扒王之王，放一個禮拜假好過，因為隨時封路，就算有客，個廚都未必返到工，除非學政府咁，買張帆布床過佢啦。
講番個百寶袋，當中重有貿發局介紹香港營商好處嘅單張，不過八方發現該局用咗一張非中國官方認可地圖，將貼近西藏兩片中國同印度有爭議嘅疆土，當係印度嘅土地，明顯係分裂祖國，好彩23條通過唔到，否則貿發局高層都好大鑊。
香港已回歸中國，貿發局就「醒水」啲，咪令到下周嚟開會嘅印度代表誤會，以為香港重係英國領土，而支持當年大英帝國將中國疆土劃畀英屬印度啦！
爆料熱線：29290000、27860099
報料傳真：26239278
報料電郵：[email protected]