十一月代理業全行業績見紅，但因之前勁賺，計埋全年至今，利潤豐厚，既然咁好搵，業主梗想租個舖畀代理啦，因為，租金點都可以收高啲啩。
有富貴公屋之稱嘅彩虹邨，翠瓊街市最近有幾個舖招租，劃一面積百五呎，房委會話明，其中一個只租畀代理行，月租萬五，維起約一百蚊一呎，相對隔籬舖三千蚊，足足高四倍幾。睇嚟，凡係代理行租舖，都要俾人開天索價，絕不手軟，呢個想法，深入民心。
房委今次算叫破格，准許代理行進駐彩虹，不過，大家睇吓圖中翠瓊樓旁灰濛濛嘅建築物，點會諗到就係翠瓊街市呢？唔理邊間代理行，喺度開業，要做到生意，認真難度高，會唔會爭崩頭，一大疑問。
另外，隔籬一個舖，租客對象都好特別，就係占卦算命。月租二千八，怕且，承租得嘅，都要先幫自己占卜吓先，睇吓嗰度係咪有得搵。邊個有興趣，記得今日截止申請。
電郵地址：[email protected]