立法會政府帳目委員會近日好戲連場，屋宇署前署長梁展文被召作供解話，但似乎愈描愈黑，據聞議員唔多滿意佢表現，梁展文隨時要去多一次立法會。
立法會議事堂上，高官被人大迫供，議員喺幕後較勁亦好精采，近日表現大勇嘅主席黃宜弘，喺閉門會議中抽秤同僚，指有人唔合作同記者爆料，唔知係咪認為此舉有損主席威信，佢三令五申話唔能夠再發生呢啲事件。
不過有人反駁，指帳委會為維持公信力，應增加透明度，若然主席肯同記者講幾句，或者唔係一聽到記者提問就收線，咁其他人就自在得多啦。
八方記得李家祥做帳委會主席時，每次會後多數會交代幾句，公布報告後又會主動開記者會，如今帳委會形象差咗一截，問題何在，相信大家心中有數。
爆料熱線：29290000、27860099
報料傳真：26239278
報料電郵：[email protected]