啱啱先升任恒生銀行總經理的財務主管陳國威，事業再上層樓，事關佢噚日又獲恒生董事會委任為執行董事，正式進入集團嘅權力核心，同柯清輝及潘仲賢一齊成為行內的執行董事。佢除咗每年可以收取12.5萬元董事袍金外，亦有279萬元的酬金，重未計可酌情發放的獎勵金。連升兩級，真係可喜可賀。陳國威將繼續同時兼任興業銀行（恒生持股15.98%）嘅董事，並在恒生負責企業策劃工作。
與恒生屬同一集團嘅滙豐投資管理亦有新委任，林寶儀就獲委任為基金推廣部主管，專責拓展該公司香港市場的零售基金銷售及市場推廣策略。
其實，林小姐99年加入滙豐投資出任零售業務董事，累積10多年零售基金銷售及推廣經驗，今次任命最特別嘅地方，係佢將會直接向亞太區行政總裁裴布雷匯報。至於喺滙豐投資做開基金推廣嘅Sandra謝李婉雯，原來去咗法興，出任衍生工具及結構產品嘅執行董事。