二十五萬人遊行，還是警方所講嘅四萬人自維園出發（據TVB六點半新聞報道，十二月四日），兩個數目相差咁遠，大纜扯唔埋，點妥協呀？晚上六時半，軍器廠街仍然塞滿人，據以往遊行經驗，點都唔止四萬人嘅，至於有冇二十五萬咁多，好難核查，各說各話，信學者猜算，最少應有接近十萬人左右。總之一句，上街人數之多，已夠震撼性，泛民主派二十五票，經此一役，相信打風打唔甩，政改方案一定得唔到四十位立法會議員嘅支持，冇得通過。
即使係二十五萬人上街，何賭王話仍然未夠五十萬人，北京唔會考慮全面普選。北京老人家之中，一位前《基本法》委員許崇德對選舉不時有話講，呢次佢話，無論多少人上街，只要有真理，唔使講普選。呢啲接近八十歲嘅所謂法學專家，自年青時候就靠左，而左派專講馬克思，無產階級專政，法律為政治服務，好似許崇德咁大年紀嘅左派，有冇真正讀過歐洲法律（大陸法），好成疑問。大陸學者之中，四十歲或以下嘅，先至真正有機會在比較冇咁封閉嘅環境下自大學一年級開始就接觸西方法律，到外國留學。許崇德呢類學者，老實講，out到唔恨，佢口中嘅「真理」，就係「人民唔准選擇，一切自有黨中央安排」，相信北京嘅十歲孩童都唔會輕易聽從。
大遊行之最大驚異（對左丁山嚟講），就係陳四萬竟然上街，令泛民主派氣勢更盛。陳太是否有後着呢？碰啱大狀組黨，假如陳太加入四十五條關注組嘅政黨，呢個黨除咗識議政及講理論之外，立即多咗一位有民望，行政能力好強，極熟悉政府運作嘅領袖人民，○七年走出嚟競選特首，中央咪話唔頭痛。到時中央自有辦法鎮住現時原地踏步嘅八百位選委，一票不能走，但陳太出山嘅話，曾特首會面對極大挑戰，公關形象及國際聲望隨時大幅度滑落，雖然肯定當選，都會搞到滿身傷痕。