元華同梁榮忠噚日第一日拍攝新劇《非常外母戇姑爺》，華哥飾演一個病態賭徒，劇情講佢逢賭必輸，所以俾人狂毆，而飾演佢契仔嘅忠仔就假扮警察救佢。
馮仁昭問華哥忠仔有冇向佢請教做好男人嘅心得？企喺附近嘅忠仔一聽到大家再次講佢單「偷食」事件，即刻好無奈咁大聲話：「華哥，今次輪到問你喇！」
衰在最初唔認
華哥話當然知道偷食事件，佢重話呢件係城中最Hit嘅新聞，不過佢覺得忠仔衰在最初唔認。華哥話：「只要忠仔知錯能改就善莫大焉，最緊要係唔好有下次，佢真係要循規蹈矩呀，今次真係一次意外足以致命，亦都可以話係一失足成千古恨。」
