李彩華（Rain）養了三隻松鼠狗，老大哥腿腿和兩隻狗女甜甜、蜜蜜。回憶起初養牠們時，三愛犬周身病痛，又屙又嘔兼生蝨，頻頻進出寵物醫院，令Rain荷包大出血。
李彩華的三頭松鼠狗，分別是一歲多的大阿哥腿腿，二姐是五個多月大的甜甜，三妹是五個月大的蜜蜜，腿腿和甜甜是Rain親自到寵物店選購的，蜜蜜則是她胞弟買回來的。
醫藥費數萬
三隻松鼠狗分別買回家時都變成病狗，令Rain驚慌得以淚洗面，同時荷包大出血，花了數萬元醫藥費救愛犬。日前Rain一拖三狗到中環，她手抱腿腿，兩隻狗女就坐手推車，吠聲震天，兩頭小狗女跑來跑去精力十足，大阿哥腿腿則搏命掙扎，雖然天氣寒冷，但是Rain卻被三隻愛犬搞到周身汗。
拍照當日三隻松鼠狗生猛活潑，想不到當初都曾在鬼門關前兜了一圈，Rain說：「腿腿買番嚟第二、三日已經病咗，唔肯食嘢，淨係瞓覺，變到好瘦。
「初頭睇醫生，可能遇到啲呃錢㗎啦，畀啲好臭嘅維他丸佢食，化驗後話佢有事又可能冇事，模稜兩可嘅，又唔好喎，咁啱我喺嗰段時間要出外登台，腿腿又係咁屙，我幾驚佢發狗瘟，勁喊囉，好彩後尾轉咗個醫生，醫番好咋。」
其後Rain買甜甜回家，打算讓牠與大阿哥腿腿結婚，但甜甜竟然病足一個月，Rain說：「佢好慘，食唔到嘢，要瞓狗醫院吊鹽水，差啲死呀，我喪喊啦。到蜜蜜買番嚟又係咁，有次我摸到佢身上有好大隻蝨，勁驚啦，可能冇戴蝨帶就帶佢出街，所以蝨帶一定要戴。」
兩狗女打交
Rain表示三隻松鼠狗在家吠叫聲震天，她笑說：「大嗰隻腿腿成日吠，細嗰兩隻狗女就會吠番佢，好似一齊叫佢唔好嘈咁。細嗰兩隻又成日打交，一日二十四小時打足二十三個鐘，好鬼百厭。」
採訪：朱倬誼 攝影：林德雄
