呢輪除咗IPO外，最多人炒嘅就係大陸地產股，好似華潤置地（1109）、中國海外（688）、富力地產（2777）同合生創展（754）等已經炒到㷫烚烚，就連一直落後的上海復地（2337），昨日股價都大升4.27％，收3.05元，創下52周新高。
不過經紀陳今日唔係推介大陸地產股，而係講本地薑嘅麗新發展（488），佢話隻股經過多年財困，終於喺舊年完成債務重組，家陣火鳳凰重生，可以炒股價較資產淨值有大折讓嘅概念。
小初聽完嚇一跳，以為自己聽錯，但經紀陳話唔好唔信，皆因已經有芬佬上咗車，家陣揸住5％股權，而且同系麗豐控股（1125）早排已經炒咗轉，好快會輪到麗展。
佢又話，麗展喺銅鑼灣同長沙灣持有唔少貴重物業，另外中環的AIGTower都有10％權益，此外，麗展下面的豐德麗（571），近年搞娛樂事業有聲有色，所以麗展點秤都唔只值毫幾子咁低。
麗展昨日升0.73％，收0.137元，成交股數4269萬股，金額584萬元。
慕容小初