年尾除咗多酒會多party以外，重有一樣多，就係頒獎禮。DHL同《南華早報》噚日晏晝見記者，公布由佢哋合辦嘅「香港商業獎」得獎名單，晚上就喺萬豪筵開40幾圍，即場頒獎。
鷹君副主席兼董事總經理羅嘉瑞攞咗今年「商業成就獎」、震雄蔣震就攞「終身成就獎」、中華媒氣陳永堅獲「傑出管理獎」、其士周亦卿獲「東主營運獎」、東源大地王嘉恩得「青年企業家獎」、屈臣氏得「海外拓展成就獎」、惠理基金管理奪「傑出成就獎」。
羅嘉瑞係名醫，真係專業同生意兩瓣都掂。佢同華華講，一個禮拜前先接到得獎通知，自己都唔知點解會獲獎，事關好多人都做得好過佢！咁又唔使咁謙虛，淨係講喺旺角開朗豪坊，扭轉區內的消費環境，呢個成就，已經夠晒班攞獎有餘啦！佢又話，每年聖誕都會留喺香港唔外遊，因為啲仔女會番嚟過節，今年都唔例外。
羅醫生致謝辭時，除咗多謝老婆仔女，最重要係多謝埋父母，因為父母教識佢好多嘢，特別係做人要有信用，同埋凡事唔好去得咁盡，所以佢同租戶傾租約時都留有餘地。嗱！朗豪坊嘅租戶，你哋下次同羅生個猛將李澄明傾租約時，唔使客氣啦！
李華華