吳君如在商台節目中硬銷男友陳可辛的新片《如果．愛》，同時狠批同期上畫、由張東健和張栢芝等主演的《無極》。《無極》製片人陳紅指是小人炒作新聞博宣傳，栢芝經理人向太則說：「我係陳可辛會嬲咯，因為個女朋友搞cheap晒成件事。」
吳君如力撐男友陳可辛執導、今日上映的新片《如果．愛》，她前日凌晨在商台主持的錄音節目《她他她！打到嚟》中，指《如》片勁敵、由張栢芝、韓星張東健和日本影帝真田廣之等主演、陳凱歌執導的《無極》卡士弱，引起《無極》內地宣傳單位不滿，並拿出內地票房紀錄指《如》片上映四日只收八百五十萬人民幣，並非自稱有過千萬票房，暗指《如》片有篤數之嫌。
或控告吳君如
記者昨日聯絡陳凱歌太太、《無》片製片人兼演員陳紅，其內地宣傳部發言人伊小姐對此事回應說：「陳小姐沒有為此事不開心，她認為這是小人炒作新聞。這只是因為有人妒忌而刻意炒作宣傳。」伊小姐又替張栢芝被指「假大胸」感不值，她說：「張栢芝是一位年輕女子，這樣被人批評，有人身攻擊之嫌，張栢芝若認真對待，可以透過律師起訴她（吳君如）。」伊小姐表示《無》片尚有兩周才在內地上映，但預售票房已超過一千四百萬元人民幣。
而中國星老闆娘兼栢芝經理人向太陳嵐昨日在電話中則說：「我真係替陳可辛唔抵，咁畀心機拍咗部好戲出嚟，聽講口碑都幾好，重代表香港參加奧斯卡，《無極》都係代表內地參加奧斯卡（編按：競逐奧斯卡最佳外語片入圍資格），大家都係高檔嘢，百花齊放咪好咯，使唔使咁cheap，踩人哋捧自己呢？我唔係鬧吳君如，只係如果我係陳可辛會嬲咯，因為個女朋友搞cheap晒成件事。佢有咗BB，應該心胸廣闊啲，如果唔係對個BB唔好㗎！」
為陳凱歌暴露
至於君如指栢芝「假大胸」，向太說：「栢芝身材好係人都知啦，使唔使電腦合成，key個頭落去好難做㗎。栢芝不嬲唔肯暴露，今次係因為劇情需要同埋尊敬陳凱歌，而且電影剪出嚟好靚。其實兩部都係好片，只係撞埋一齊啫，《如》喺內地霸唔正聖誕檔期，咁都冇辦法，喺內地《無極》嘅迴響係大啲。」
而君如前晚以女主人姿態由男朋友陳可辛陪同出現《如》片首映，她以紅色低胸裙襯皮褸出席，身形明顯豐滿了不少，而且亦已見肚。君如接受訪問時，透露肥了十五磅，但不願透露懷孕多久。問君如何時與陳可辛拉埋天窗，君如說：「私人問題唔想講。」
採訪：張止寒、比華利、張俊銘 攝影：葉君海
