恒指一度跌30點，到埋單反升144點，幾乎收復前日失地。中移動（941）、中海油（883）同滙控（005）帶起恒指92點。
大市有火車頭，跌後升得番。考眼光，揀中會郁嘅股票，向佢哋C輪埋手，有魚有肉。
中電信C輪9796：中電信（728）收2.70元，有番啲勢，喺中移動不斷上升帶動下，中電信遲早會做番齣好戲，月前高位3.275元，𠵱家仍有大把水位。
中電信昨日輕輕郁兩個位，C輪3443與9293則已彈升20%與30%。高追升得急嘅C輪，不如諗吓正路熱門C輪9796，隻輪明年9月初夠鐘，唔怕咁快虛耗時間值。輪價26仙，溢價9.6%，槓桿率10.4倍（有效5.7倍），引伸波幅28.8%。按公式計算，9796昨日理論升幅2.67仙，但只升得1仙，即係未升夠。
建行C輪9983：下晝3點18分，建行（939）有神秘人喺1分鐘內以每股2.50元掃清大約60球，收2.525元。有份搞建行上市嘅大摩，啱啱出報告睇好建行，唔知大掃貨者是否大摩。
建行有得睇，買C輪，始終係前日推介嘅9983最靚，明年6月尾夠鐘，輪價30.5仙，溢價6.3%，槓桿率8.3倍（有效5.7倍），引伸波幅27.2%。
章盛