國民黨榮譽主席連戰同夫人連方瑀以及仔女連勝武同連詠心，噚日下晝飛來香港訪問四日，今日將接受中文大學頒授榮譽法律博士學位，以表揚佢致力促進海峽兩岸和平發展等貢獻。星期六，連戰重會喺中大發表演講㖭。連戰抵港後冇答記者問題，不過之前佢就爆料，話三十八年前曾經同太太到香港度蜜月，闊別咁耐，佢話對香港感覺良好喎。
派李國章接機
以煲呔為首嘅特區政府今次一反常態，林瑞麟要留喺立法會為政改方案答辯，就派教統局局長李國章代替，再加多個政制事務局嘅麥清雄，大陣仗去機場接機，煲呔聽日重會宴請連戰，以盡地主之誼。嗱，咁先係「政治家」喇。其實連戰今日都會見到煲呔，因為煲呔係八大院校嘅校監，中大今年嘅畢業禮佢答應咗會出席。今日一齊攞榮譽博士銜嘅重有鄭海泉、金耀基以及汪道涵，不過，汪道涵病重，可能嚟唔到攞。
劉校長轉數高
呢件事，你睇到人哋中大校長劉遵義轉數幾高，一見連戰喺今年頭獲得北京高規格接待，展開所謂「和平之旅」，打破兩岸以及國共兩黨半個世紀嘅僵局，劉校長立即第一時間宣布頒個博士銜畀佢，幾有政治智慧。而特區政府重儍吓儍吓，連戰過境轉機北上，林D9就唔畀中華旅行社總經理鮑正鋼去接機，搞出個大笑話，之後煲呔重挺佢話佢做得啱。結果連夫人早前來港演講，還以顏色，婉拒林D9嘅宴請同幫忙，畀個大檸檬佢食。
政治之變幻，當然唔係特區呢班小角色可以明瞭。記得今年一月，老董同林D9竟然怕馬英九嚟香港會影響人大常委審議「反分裂國家法」草案，押住入境證不簽，重使橫手叫小馬哥唔好嚟。哈！𠵱家小馬哥做咗國民黨主席喇，國共又打得火熱，連一個落咗台嘅連戰嚟，又勞師動眾去大嶼山接機，你話係咪好瘀呢？不過佢哋都瘀慣。好似阿D9，噚日竟然話立法會係民意機構，冇理由逆民意而行。真係似番句人話，但就唔知醜，23條時民意夠清楚不過，你哋又迫立法會通過？所以用呢亭人搞港台事務，唔醜死都笑死。你睇何厚鏵，你拒馬英九來港，人家小小澳門就玉成中台兩邊談判春節直航，拉晒兩岸代表去自己度傾，嗱，呢啲至係特區之特，至係對統一嘅貢獻，明冇？
爆料熱線：29290000、27860099
報料傳真：26239278
報料電郵：[email protected]