詹瑞文和妻子甄詠蓓為了讓小朋友可欣賞舞台劇，特別炮製後日演出的兒童劇《查查茶篤撐》，講述一位小朋友尋找父親的過程，希望父親們除了賺錢之外，亦要多關心子女。
詹瑞文為人熟悉的作品可以算是四度加場的舞台劇《男人之虎》外，他亦致力創作兒童劇，希望讓小朋友早些認識舞台劇。原來早於九八年時，政府曾委託阿詹創作兒童劇，自此之後，他每年都會推出兒童劇場。阿詹說：「九八年嗰時政府畀咗二十萬委託我哋製作一個兒童劇，嗰時我覺得好開心，因為有人畀成二十萬我去打怪獸。」
阿詹現正籌備聖誕兒童劇《查查茶篤撐》的演出，此劇內容以中國傳統神話故事為大綱，主角是一名住在垃圾山的小惡霸嗱喳，他在尋找父親的過程中會遇上牛魔王、蝦部長及大蚌精等。
小孩反應真摯
阿詹說：「我今次呢個劇係講父愛，𠵱家好多爸爸因為掛住賺錢，久而久之就忘記咗自己應該同仔女建立一個關係。」
《查》劇由阿詹太太甄詠蓓執導，她覺得小朋友的反應能給她最大的滿足感，甄詠蓓說：「小朋友嘅反應係最直接同最真摯，佢唔鍾意嗰樣嘢就會講出嚟，鍾意時又會大叫大笑。𠵱家嘅細路都係接觸電腦、電子遊戲，成日都係對住一個玻璃屏幕，所以我哋覺得真人表演可以帶畀佢哋唔同嘅刺激。」
採訪：李珮洳
攝影：仇志德
