外圍美日股市反彈，但力度唔算好勁，港股早市重係一副欲彈無力的模樣，午市初段重要稍為插穿早市底部，作最後震倉，跟住期指就好似揹上火箭咁飆升，半粒鐘唔夠已急彈約兩百點，在期指急升帶動下，港股最後倒升144點收市，報15134，成交亦配合升勢，高達220億元。
今個禮拜港股風急浪高，搞到好多散戶暈陀陀，不過若叠埋心水炒新股就唔受太大影響。昨日東風（489）上市，高見1.81元，收1.74元，即食亦可執10至8個巴仙，已經算唔錯，可惜駿威（203）冇趁東風上市跑一轉，走勢非常牛皮，全日在2.50-2.525元兩個價位窄幅上落，似乎仍有所待。
其實近日市場對駿威評價已有改善，不排除好快會有技術破位，仍以2.40元作止蝕位持有。
滙控（005）昨日成為升市火車頭，升0.70元，收125.10元。中移動（941）過去1段時間累積升幅大，現時大戶要舞高弄低，逐漸要加大滙控比重，假如大市仍未升完，滙控將成為最後一棒的接力者，而且揸滙控會瞓得安心。
至於滙控C輪方面，4907仍係穩中之選，而9074則爆炸力較大，發行商服務亦令人滿意，但交投就較疏。
油價反彈 餘勢未了
中資股是昨日主角，油價反彈令石油股重現活力，油價近期形成雙底反彈，過去幾日似營造旗形，一旦破位，可見64-65美元，中海油（883）伺機炒一轉。
趙飛雲