煲呔星期日唔知係咪俾數以十萬人上街市民嚇親，抑話俾陳太激親，面冇人色咁喺禮賓府見記者，聽講中方人士都覺得佢好似唔係幾掂，八方日前撞到自由黨周梁淑怡，問佢點睇？
點知周梁笑笑口咁話，嗰晚煲呔嘅講話其實好多係講畀陳四萬聽，叫八方返去再細心閱讀，咁煲呔又的確好苦口婆心，猛話自己同傳媒上發表意見嘅長者一樣，想見到普選。唔通呢個長者係陳太？
講番個方案，推銷員林瑞麟本來係錄音機一個，冇乜新意，難得佢噚日竟然肯動吓腦筋玩吓比喻，話政改方案雖然唔算色香味俱全，但至少多數市民都覺得可以入口品嘗，點知一啲議員唔明白炮製時間表要好長烹調時間，只叫人唔好起筷要換菜式，令佢好無奈。
楊森就扮晒食家話，查實煮乜菜都冇所謂，最緊要係邊個叫菜，邊個做大廚，可惜𠵱家兩樣嘢都由中央搞晒，政府只係做傳菜角色，所以香港人呢鋪好難啃。
爆料熱線：29290000、27860099
報料傳真：26239278
報料電郵：[email protected]