中意控股（1198）噚日午後突然成交大增，股價一度推高至3.575元，升幅達17.2%，但高位好快有回吐，最後收報3.375元，升10.65%，成交高達2117萬元，比起近期每日數百萬元成交顯著增加。
中意由年中7元水平調整至今，跌幅逾50%，公司於9月公布中期業績後，管理層出手增持，公司亦頻頻回購，但仍未能令股價止跌回穩。Cookie話，今次可能唔同，據聞話此股有機構投資者睇好兼出手增持，此外亦有傳聞話可能涉及賣盤，所以不妨睇多兩眼。
中意過去一年傳聞多多，其中最大殺傷力，莫過於傳出創辦人林岱辭職及出現人事變動，國內家具業務可能放緩亦令投資者擔心。現時中意的股價已跌得相當殘，公司的營運亦無傳出不利消息。中意的中期盈利增長11%至4933萬，預期PE7.15倍，中期息9.5仙，股息率有5.6%，其實算唔錯。而內地房地產市場銷售理想，亦將帶動對家具的需求，中意必然受惠，公司已斥1億元提升產能。
中移動（941）周二曾跌近3%，市場傳出配股，最終證實係流料，噚日股價反彈回38.90元收市，升1.4%。不過股民要小心內地新推出的政策可能會導致投資者減持中移動，有關政策就是要求預付卡用戶須以真實姓名登記，呢項要求可能會導致中移動預付卡客戶增長放緩甚至倒退，因為預付卡客戶一向是中移動及聯通（762）主要增長動力，一旦投資者見到兩隻電訊股上客量放緩，可能會沽售。
堡獅龍炒錯業績
堡獅龍（592）噚日大幅踢高10%至1.02元，阿虎重以為有春江鴨預知中期業績靚靚，點知收市後開出嚟，只係賺4500萬元，倒退27%。黑客話，聽講今次唔係炒業績，而係憧憬公司公布完業績後，大股東可能會增持，因為此股由1.70元跌落嚟，累積跌幅相當大，而股價在0.88元水平已見明顯支持。
阿虎