「你知唔知呢啲係乜？」慧慧拿出一包東西放在我面前。「這是櫻桃蘿蔔，我喺日式超市買㗎，你話乜植物都識，呢啲睇怕唔知喇啩？」我笑笑口拉佢出田，指住我種的櫻桃蘿蔔：「係咪呢啲呀？」「唓！我又唔係你塊田啲蟲，點知你種乜噃。」不過我安慰慧慧，話到現在12月咁凍，櫻桃蘿蔔都開到水尾，佢買嚟送畀我都好合時。櫻桃蘿蔔比一般蘿蔔細好多，味道更香甜，一粒種子只生長一個櫻桃蘿蔔，九月落種子，70日後見到露出一半喺地面就可以收割。「講咁多做乜，餓死人咩，拎去整啦！」於是我將櫻桃蘿蔔切絲（唔使去皮㗎！）用鹽水浸去苦味，揸乾，再用清水洗，然後加少許糖、醋、鹽和其他蔬菜拌勻，加上櫻桃蘿蔔粉紅色，就做成一味好吃好睇好Cute嘅沙律。「咁凍重食沙律！」「食沙律有分季節㗎？好味嘛！」「咁你種嘅嘢又真係幾好味！」「吓！我用你買嚟嗰啲整嘅噃，我自己種嘅咁矜貴，梗係留番自己食啦！」「小器鬼！」（五十四）
阿花