證監會前日頒發「精明投資者大獎」，有6位市民獲獎，由證監會主席辦公室顧問莊思滔頒獎。獲獎市民主要係舉報一啲金融騙局，其中3名獲獎者，都係接獲懷疑鍋爐室經營者嘅自薦來電，騙徒分別聲稱在巴哈馬、英屬西印度群島及上海經營業務，提供海外股票投資服務，叫佢哋落叠。幸好呢批醒目嘅投資者保持警覺，並沒有蒙受任何損失。
其餘3名獲獎者，係舉報收到偽冒電子郵件，企圖誘使佢哋透露個人資料。佢哋分別收到聲稱由一間海外銀行發出嘅電子郵件，要求客戶點擊郵件內嘅超連結，然後輸入個人資料以作確認。基於上述舉報，證監會得以將7家可疑公司，列入警報名單內。現時證監嘅投資警報名單共有298家可疑公司資料。自今年1月以來，證監已接獲120宗有關鍋爐室及互聯網金融騙局的投訴，報稱涉及損失約2540萬元，其中兩名受害人為香港投資者，損失合共約58.6萬元。