大遊行過後，表面上一切回復平靜，其實就如箭在弦。煲呔以及一眾智囊噚日喺行會聽咗肥龍報告後，決定如期將政改方案喺呢個月二十一號交立法會表決，𠵱家玩緊ShowHand，當然冇咁快揭出底牌，手上有二十五萬人呢張王牌嘅泛民主派本來有say，因為形勢比煲呔強，不過，喺度等對家出牌都唔係好自在。
八方噚日問最受市民歡迎嘅A45湯家驊有好消息未？佢話梗係未有，𠵱家重等緊電話響。湯大狀哋要講嘅嘢已經講晒，所以一動不如一靜，靜候特區同中央政府佳音。如果個電話重係唔響，最後只好否決個鳥籠方案，冇面畀。
湯大狀一直覺得中央比煲呔有得傾，不過對於二○一七年普選方案，佢就唔多接受，因為煲呔到時都落咗台，邊個去保證？咁又係，煲呔只可以做到二○一二，佢個接班人未必係同路人。重有，如果唔取消委任議席可以選特首同立法會，湯狀亦好難收貨。湯狀條件列得咁清楚，睇吓中央點回應啦。
12.4遊行氣氛好過7.1
講番星期日個遊行，湯狀話好感動，氣氛重好過○三年同○四年嘅7.1大遊行，所謂人心所向，由沿途市民向佢哋不斷拍手就知道。當然今次大遊行，爆出個陳太同黃毓民，都搞到大家好頭痛。
陳太聽講唔係45條關注組叫出嚟嘅，但係邊個叫都好喇，四萬一出，誰與爭鋒？結果焦點聚晒喺佢身上，中央都高度關注，唔知阿太搞乜。
另外就係不受控制嘅名嘴黃毓民，臨尾走上台搶咗支咪，出其不意叫喺政府總部嘅遊行人士留低，等煲呔回應先走，當時大家冇晒符，聽講華叔就好唔高興，因為以往民陣同支聯會都係見好就收，唔會死拖（長毛哋自己搞，同主辦單位無關），結果煲呔講完啲人都唔肯走，最後要清場。
如果話遊行開始被陳太騎劫，收尾就俾毓民騎劫埋。八方聽聞，泛民周一開會檢討，湯狀講笑話以後要blacklist毓民，點知呢句閉門嘅sound-bite竟然傳到名嘴耳裏，噚晚佢阿哥喺電台大興問罪之師，湯狀本來想和平遊行，和平結束，點知最後重要向毓民道歉講對唔住，真係諗唔到。
泛民主派今次遊行，本來叫到二十五萬人出嚟已經打亂煲呔陣腳，但係如果自己唔爭氣，郁啲就互相指摘，就前功盡廢啦。
爆料熱線：29290000、27860099
報料傳真：26239278
報料電郵：[email protected]