吳君如男友陳可辛執導的新戲《如果．愛》明日上映，君如昨日凌晨在她主持的電台節目中，極力推薦男友的新片，更一共播放了五首《如》片的電影歌曲。與此同時，君如狂踩下周四上映的聖誕檔大片《無極》卡士弱，揚言四套聖誕檔華語片最後才會看《無極》，用盡在電台開咪的優勢。
吳君如在昨日凌晨播出的商台錄音節目《她他她！打到嚟》中，極力推薦男友陳可辛執導的《如果．愛》。
今年聖誕檔共有四齣華語電影，包括《如果．愛》、《無極》、《情癲大聖》及《情義我心知》，當君如與拍檔主持田蕊妮及鄒凱光談到該四套電影時，她說：「《如果．愛》係一啲典型情侶睇嘅愛情片，我睇到啲宣傳三個人十年嘅愛情，兜兜轉轉，又好浪漫，又有跳舞咁樣，又有雪地。你唔覺得金城武、池珍熙同張學友都囊括晒唔同階層嘅女人咩？」
田蕊妮聽後笑指君如喜歡的只是導演陳可辛，君如即說：「如果個導演拍得差都唔睇啦！總之係一套有聖誕嘅氣氛電影，係二十五年嚟嘅華語歌舞片，呢個係個期待。」
先踩剝衫
「覺得張相似電腦合成」
之後君如又談到另一極受注目的聖誕檔大片《無極》，她說：「第二部係張栢芝、謝霆鋒嘅，畀我嘅感覺有啲似《英雄》，大堆頭，但係《英雄》比佢着數啲，就係《英雄》卡士大，陳道明、張藝謀、張曼玉同梁朝偉、章子怡，呢次唔知點解會發張栢芝剝衫相，栢芝剝衫都係一個好大嘅賣點，一張係栢芝雙手掩住個胸，但係我覺得張相好似電腦合成咁。我成日覺得張栢芝有咁大嘅咩？陳凱歌都係中國一個大導演，張栢芝肯剝唔出奇。」
再踩卡士
「真田廣之唔係我偶像」
談及《無極》一片期間，君如仍將《如》片掛在口邊，她說：「𠵱家電影大趨勢都係咁，總之就中、港合作，你睇吓《如果．愛》有池珍熙，又有大陸演員。」
君如續說：「《無極》又有真田廣之，然後有一個張東健，呢個係近呢幾年一個好典型嘅公式，但係我覺得佢嘅卡士弱咗啲，但都有某程度上嘅觀眾，譬如我畀六十蚊，睇好靚嘅景、千軍萬馬，咁有啲觀眾唔使去反思、唔諗嘢嗰啲，就覺得正呀！
「其實聖誕片有兩部喜劇，一部叫做愛情歌舞片，一部叫做『大型娛樂古裝宮闈歷史可能有露點片』。其實呢四部都幾好，但係我《無極》係擺最後，真田廣之唔係我偶像，從來日本人做戲、日本人嘅形態，我唔係太迷。我諗《無極》都係睇大陸市場，宣傳都冇其他嗰三部咁勁，港產片就三部拖，得閒睇《無極》啦！」
早有前科
年前踩《英雄》捧《金雞》
而君如在節目中更先後播放了五首《如果．愛》的電影歌曲。其實君如○二年時亦曾借電台節目為其電影《金雞》宣傳，並大肆抨擊同期上映、由張藝謀執導的《英雄》。
就君如狠批《無極》一事，該片香港發行商發言人昨日回應說：「每個人都可以有自己唔同嘅睇法，但要從中肯同持平嘅角度出發，以平常心去睇。有啲人用既定嘅睇法，同埋自己嘅立場咁講，我哋都會好尊重佢，呢啲都係純粹佢個人嘅意見，相信觀眾自己係有判斷能力嘅。」
此外，金城武前晚與周迅在新加坡出席《如》片首映時遲到一小時，行紅地氈又逗留不夠五分鐘，加上金城武拒絕拍照及訪問，令當地傳媒極為不滿，向他大喝倒采。昨日吳君如、陳可辛、金城武和周迅先後由新加坡返港，盛傳大肚的君如則穿上鬆身裙，腹部微微隆起。
採訪：蔡丹
