巴伐洛堤演唱會，在會展舉行之夜，左丁山揸車到會展新翼停車場，發覺已經封咗，冇門口入，好彩去得早，立即轉過去舊翼停車場，僥倖搵到車位，可以安安樂樂去會所食飯，再行過去會場坐低等八點開場。到咗八點十五分，見到重有好多人入緊場，作家玲趕到，原來佢嘅座位就喺左丁山隔籬。作家玲話：「唉吔，外面交通大擠塞，好多觀眾會遲到。」世貿未到，警方已經緊張到封停車場，認真煩，下個禮拜，遠離會展為妙。
會場內亦碰到酒店業人士Ｍ，佢話多得世貿唔少，一早接到嘅訂房，最近紛紛退房。主要有兩類人臨時唔嚟，一類係外國政府官員，可能預知今次世貿傾農業品貿易自由化，因歐盟反對大幅度削減農業關稅及農民補貼，必定傾唔成，所以好多政府人員費事嚟香港浪費時間，取消行程；第二類人係商務客，聽見有示威活動，不如唔嚟。酒店Ｍ嘅最新煩惱就係兩類人之中，都有公司戶口（corporateaccount），本來臨時退房，可以殺訂，但啲公司戶口梗係博命嚟講數，以長期客仔為理由，要求退訂。酒店Ｍ話：「退訂，應該於理不合，損害酒店利益；唔退訂，會與啲長期大客仔關係緊張晒，總之好煩，最衰都係世貿啦，以後求求求政府唔好再貪慕虛榮，主辦乜，主辦物。」
一個世貿，怨聲載道，假如今個月特首民望下跌，除咗與十二月四日大遊行有關之外，應可賴埋政府申辦世貿不得人心，以及佢啲商界「老友」出口術幫倒忙。顧明均賣廣告於前，胡應湘「暴民政治」於後，再加上充滿娛樂性嘅何賭王開盤「五萬人」，一日話佢睇咗幾十年「盤」，唔會錯得去邊，第二日又話即使有十萬人，非成年人唔算數。我哋睇電視笑到碌地，搵黎文卓編喜劇，台詞邊度會寫得咁抵死過癮吖。諗落，何賭王係香港大學自孫文以後嘅最醒目產品，許仕仁十足賭王個款，不過火候及娛樂性重未夠，要向何賭王不斷學習。