出爐無綫最佳女主角汪明荃同最佳男配角夏雨主演嘅劇集《識法代言人》今晚首播，噚日佢哋聯同胡杏兒、陳鍵鋒、劉綽琪、胡定欣同徐子珊到銅鑼灣宣傳，重同現場嘅市民玩遊戲。
噚日氣溫急降，但劉綽琪依舊打大心口見人，簡直博到盡，玩遊戲時又不自覺咁彎低身大晒身材，搶晒阿姐風頭，難怪馮仁昭見到啲記者叫阿姐做訪問時，阿姐即刻話：「又做？講咗好多，冇乜嘢講喇。」
「最緊要靚」
劉綽琪話：「我唔係咁怕凍，最緊要靚，有新劇上梗要落本宣傳，我都做足工夫預防走光，今日嘅裝扮同劇中嘅我都幾相似，比較開放啲，襯晒今日嘅場合。」主角胡杏兒就着晒樽領冷衫加毛毛褸，佢話：「我今朝起身四肢僵硬好凍呀，天氣咁凍都要轉吓季，就算我咁着都冇嘢睇啦，我見到劉綽琪我都話佢勁呀。」
而胡定欣早排俾記者影到同緋聞男友吳浩康喺大牌檔食飯，同場重有吳浩康家姐，胡定欣對戀情仍舊否認，但就勁讚吳浩康係好男仔。
