立法會交通事務委員會到廣東參觀，呢啲統戰騷，民主派先係主角，所以鄭家富同長毛梁國雄遲到，即被左仔狠批，鬧出茶杯裏的風波。鄭家富噚晚結束行程返港，透露同內地官員會面期間，傾到內地都逐步有民主，連人大選舉都有差額選舉，可見民主唔係洪水猛獸，但同官員提起喺內地收睇香港新聞，一播到有二十五萬人參加爭普選大遊行嘅消息，訊號即時中斷插播廣告，班官就周身唔自在。
鄭家富同官員講，一國兩制之下，香港人遊行示威好平常，內地毋須咁敏感，不過嗰位官員卻面有難色，話呢啲事「要特別處理」喎。
長毛、大嚿同阿富好日都冇得回鄉，所以四處拍照。兩日行程話咁快結束，長毛一抵港，就收到佢申請回鄉卡被拒嘅壞消息，認真大殺風景。
爆料熱線：29290000、27860099
報料傳真：26239278
報料電郵：[email protected]