昨日大市臨尾無端端急跌，原因係中移動（941）突然被質低，雖然小初呢排炒股炒得好順手，亦因為見個市突然下跌而窒住。不過經紀陳話，大市上上落落並無損公眾人士玩IPO的興致，昨日好多行家淨係做新股都做到唔停手。
另外，經紀陳又話，呢排IPO隻隻掂，早排掛牌潛水的半新股亦力爭上游，除日前講過嘅海升果汁（359）外，另外一隻10月份掛牌首日就潛水兩成的佳邦環球（471），近排亦見異動，據講亦係朝重返招股價的目標進發。
來自台灣寶島的佳邦，喺10月初以每股1.02元招股上市，掛牌首日就跌咗兩成，其後雖有上落，但從來都未見過家鄉。公司主要做軟性印製電路板，客戶以手機商為主，照計都頗有概念，如果有關人等肯畀多些少心機向基金推介，相信股價要浮上水面唔難。
佳邦昨日升7.35％，收0.73元，成交股數736萬股，金額523萬元。
慕容小初