恒指昨跌穿10日線（現處15071），反映市底未如想像般強，可能要進一步考驗20日線14900，未上車可吼位入市。趙飛雲較擔心則是美日股市先前放得太快，有些少怕捱唔到尾（年結），率先展開調整，若非如此，港股仍有望在年結前升破15509，再創全年新高。
油價反彈 飛機股迴避
紐約期油周一晚高見60.80美元，好彩昨日在亞洲市回落，跌回59美元水平，倉內的航空股未有跌得太多，但為了鎖住國航（753）的利潤，決定在2.60元沽出食胡，另一隻東航（670）亦於1.23元平手沽出，暫避油價反彈的鋒頭。不過，兩股前景看好，會伺機在低位補回。
此外，昨日見駿威（203）尾市仍企硬在20日線之上，在2.50元買入5萬股，希望今日東風（489）首日掛牌，兩股齊齊飆車。駿威技術仍差，但短炒執幾毫子唔算大貪，暫以2.70元作首目標，跌穿2.40元止蝕。
昨日有些少運，原先計劃滙控（005）跌至124.80-125元水平，收集滙控C輪4907，但引伸波幅偏低的4907昨日在正股下跌時發揮抗跌力（引伸波幅亦上升），形成跌幅遠較預期小，趙飛雲自然唔肯買貴貨，因而逃過一小劫。
滙控和恒指一樣，跌幅較預期大，連20日線（124.90）亦失守，可能要考驗124-123.60元支持位，到時才吼位買C輪博反彈。4907引伸波幅回升，吸引力稍減。
趙飛雲