眨吓眼又到年尾，打工仔最希望新年有人工加，有花紅分。講到明因為錢多，所以要派啲俾股東嘅大家樂主席陳裕光，噚日喺集團業績發布會後話，明年員工平均加薪3%，另外，會按工作表現發放花紅，最多會有一個月糧。3%對打工仔嚟講，話多唔多，話少唔少，有得加總好過冇。
員工薪酬慳住嚟加，但改裝分店就唔可以慳，雖然一切設計同形象，仍然由陳裕光一手包辦，但就係豪裝。陳老闆話，以往佢一直標榜去大家樂係「快餐收費，餐廳級享受」，踏入第四代，呢個口號要進一步提高，就係「快餐收費，酒店級享受」。首家第四代大家樂喺尖沙嘴嘅港威商場面世，全店換上舒適軟坐，裝埋PLASMA電視機。陳裕光話，新店收費同其他店舖一樣，至於每間舖翻新嘅成本，則由第三代嘅120萬元增至200萬元。