早上歎一杯香濃咖啡，既可提神又可享受其獨有香味，但每次沖泡過後，留下的咖啡渣便會隨手棄掉。其實，咖啡渣可廢物利用，不單止有除臭吸濕之效，剩餘在咖啡渣內的咖啡油起了潤澤作用，能把柚木地板及木家具擦得令立立，變成香味十足的天然打蠟水！
記者：招佩珊 攝影：譚盈傑 模特兒：Cat@Salvador
自訂咖啡日
日日掛住返工屋企亂過鬼，就搵日放假，沖定咖啡，執拾屋企，一切清潔工作亦由一杯咖啡開始……
飲杯提神
面對一大堆家務，阿Cat依然從容淡定，全因她找到清潔法寶──咖啡渣。喝過一杯至愛的咖啡後，開工！第一項任務係打蠟，咖啡渣內的油份能潤澤柚木地板，有如幫木地板打了蠟；當然，並非擦一次就可將地板如用打蠟水變得令立立，但既然咖啡渣最終都是倒掉，用得唔好嘥！
除霧氣照爆鏡
咖啡渣除了可擦亮木地板及木家具外，其油份亦有助去除浴室內鏡子及玻璃上的霧氣，效果如同塗上防霧劑，即使浴室內滿室蒸氣，鏡子亦不會矇查查。
叮出咖啡香
微波爐使用率奇高，無他，蒸、煮、燉、焗樣樣皆能，叮幾分鐘就食得；亦因為叮得多，積存兼混雜了各種異味，而將咖啡渣放入微波爐叮1-2分鐘，可將異味吸走，更留下陣陣咖啡香！
鏟走煲鑊油臭味
油炸後或留下濃郁香料氣味的鍋或鑊，加入咖啡渣以慢火輕炒至乾身，氣味亦隨之散去，炒完後倒去咖啡渣，將鍋或鑊清洗乾淨，油膉味、怪味無晒！
替植物施肥
咖啡渣的碳氮率偏高，最宜充當天然肥料；用時毋須風乾咖啡渣，放涼後倒在盆栽植物的泥土上，便可達到施肥效果。施完肥，都接近中午，做了一個上午家務，要食番個午餐補充體力兼攤唞一下。
辟鞋臭
應今季長靴熱，幾乎日日皮靴包實對腳，唔焗出臭味才怪，還有一大堆波鞋、高跟鞋，臭味薰天。而風乾後的咖啡渣，有如活性炭般有無數氣孔，它可產生與活性炭相類似的作用，具有吸收臭味的效果，因此大可放一些咖啡渣在櫥櫃、貯物箱及鞋內，去除臭味。
溝洗手液強力去污
食完Lunch，唔記得戴番對手套做家務，雙手沾上污垢，洗手時，不妨將洗手液或番梘和咖啡渣揉搓雙手，其有如活性炭的效用，可以吸附微小的污垢；另外，若然切菜時留有大蒜味或洋葱（Onion）味，以此方法洗手可辟味。
咖啡渣粗粒最好用
因應不同的沖泡方法，咖啡豆會磨成不同粗幼度的咖啡粉，當中以蒸餾式及濾壓式所剩下的中至粗粒咖啡渣最合用，因不會擠出絲襪外的地方。切忌用即溶咖啡粉，因遇水即溶；混有糖及奶粉的三合一更加用不得，免得惹來一堆鼠蟻。絲襪是包住咖啡渣球的最佳材料，其薄身柔軟的質地亦不會刮花地板；製作咖啡球前要先將咖啡渣風乾，想慳時間的話可放入焗爐烘乾；一個如掌心般大的咖啡渣球約需8-10湯匙咖啡渣，以擦柚木地板為例，一百平方呎的柚木地板大概要3-4個咖啡渣球。
