價錢唔講住！XBOX360行版明年3月預產期

新世代主機XBOX360於5月嘅E3曝光，短短半年就已經準備就緒，可以推出與機迷見面！今次「咪記」經過XBOX一代教訓，外形上大玩瘦身，遊戲內容喺交足學費後亦有所改進，美國開賣當日，連BillGate都出來親身試玩《PGR3》，就吸引到大批機迷排隊搶購。前日香港咪記終於公布XBOX360發售資料，將於06年3月2日上巿，價錢未知，要保持神秘咁話喎！

記者：許福合　攝影：陳偉強

好耐都無新主機推出，XBOX360推出當然係機壇話題，今次咪記對新機非常緊張，事前對推出日期同售價都唔肯透露，另一方面對水貨嚴厲打擊，加上水貨多數係美版機關係，好多玩家都話要等日版，所以巿面水貨可以話用慘淡收場嚟形容！行貨推出之時，跟隨嘅行版遊戲只有4隻，筆者心水推介有《DeadorAlive4》同《PGR3》！嫌少的話唔緊要，因為屆時日版已推出一段時間，機迷應唔怕無Game玩。

■直立式機身，睇落好似部Mini-PC一樣。

■咪記好搞鬼，搵嚟3個「大肚佬」，揭開肚皮話畀大家知，行機要出年3月2號先到貨！

■《PGR3》畫面完美程度比《GT4》更真實。

搶先推出免費玩Live!

今次360搶先PS3推出，飲晒頭啖湯；美版推出時分為2個版本，套裝版同CoreSystems，套裝版多咗無線手掣、對講Headsets、20GB硬碟等，而香港行貨推出邊個版本暫時未有定案，價錢亦唔肯透露，以美版套裝版賣399.99美元（約$3,200），日版賣37,900日圓（約$2,500），一般估計香港行貨大約定價$2,800-$3,000左右，都算可接受！
XBOX一代雖然成績麻麻，不過已成形嘅Live!就成為360嘅撒手鐧，每部主機都會有個Live!Silver免費服務，只要駁好Cable，360即可上Live!，可以Chat、睇Demo等，如果要上網打機，只要升級為金版（費用同樣未有公布），就可以玩到全線遊戲，比好多網絡遊戲都抵玩。
初試360，畫面感覺超正，如果話XBOX嘅畫質是VCD，那麼360的畫質就可算達DVD級的高精細！而且遊戲進行時唔使點Load碟，打落真係好爽快，就算好複雜的畫面亦唔見爆格或跳格情況，真係幾強吓！

■第一次接觸360，當然要玩又要影！

■360無線手掣，手感同舊XBOX手掣差唔多，都係大咗啲。

■現場設位咗4個試玩區，分別試玩到4款同360同期發售嘅遊戲。

硬件機能強打機兼聽歌

360貴為新一代遊戲主機，硬件唔使多講，與上一代比較當然強勁得多，要留意係跟機個20GB硬碟，係放喺機頂，可以隨時拆落嚟，替換或同朋友交換用都得，作用除咗令LoadGame速度提高外，亦可放入歌曲影片慢慢睇，而且有時Live!上會有最新遊戲試玩Demo下載，容量可大至超過500MB，無個硬碟又點成事呢！
另外，機迷亦可將歌曲抄進硬碟內，打機時可隨時跳出遊戲，揀歌嚟聽，實在方便！而360同時亦可作為MediaCenter，睇片睇相聽歌都掂，可以話係一部史上最實用嘅遊戲機！
行貨重有成3個多月先推出，機迷當然等得心急，其實日本呢個月10號就會推出日版，理論上香港行貨同日版，「機能」應該係一樣，等唔切不妨過幾日去Game舖「捕」住。