煲呔同肥龍為政改頭痛，而唐唐就唔理得你咁多，星期日下晝先由上海返港。原來唐唐今次回滬，除咗公事之外，重同唐爸爸以及唐媽媽一齊為祖父唐君遠嘅銅像揭幕。
八方前晚喺個社交場合遇上唐媽媽，見佢身披粉紅色皮裘，問佢香港係咪好凍，點知唐媽媽話幾時及得上海。佢話，星期日由上海返港，覺得香港好暖。問佢點睇遊行？唐媽媽話返到嚟都遊完啦，遊行喺香港都係慣常事，冇乜特別咁話。
講返個銅像，唐唐乘今次去上海開會之便，同父母一齊為一間中學圖書館內豎立嘅祖父銅像揭幕，原來唐家有個教育基金，時常都有資助鄉間教育事業。唐唐唔使理政改，但係噚日喺聽取區議會主席同副主席意見時，黃英琦都將佢一軍，話政府口口聲聲要加大區議會職能，但係每年十八個區夾埋只係撥款唔夠兩億，點可能有大作為？
爆料熱線：29290000、27860099
報料傳真：26239278
報料電郵：[email protected]