臨近年尾，銀行特別多搞作，所以呢排啲賓架頻頻見報。噚日又到恒生大班柯清輝，佢哋間銀行過去一直有贊助「恒生銀行跳躍音符伴成長」呢個活動，今次已經係第8年，諗住搞足22場免費學生音樂會，估計有成６萬個學生受惠。
柯清輝噚日唔單止去捧場兼致辭，重即場表演──拍手掌！唔好以為係隨隨便便咁亂拍，佢係聯同香港管弦協會常務委員會主席何承天，以及管弦樂團嘅指揮鄒翔等人一齊表演，表演曲目就揀選咗史蒂芬．萊奇(SteveReich)嘅「拍手音樂」（ClappingMusic），以掌聲代替樂器來奏出呢首歌，難度好高㗎！
柯大班喺台上鬼咁投入，拍到手都紅埋，華華問佢練咗幾耐，佢大大聲話「一兩分鐘咋！」咁犀利？卒之有人踢爆，話佢提早咗15分鐘到場喎，係咪練習就唔知，但柯大班咁忙都咁落力拍手，確實係抵畀啲掌聲佢。
李華華