昨日是李克勤三十八歲牛一，前晚他與女友盧淑儀和未來外父外母到西貢擦海鮮賀壽，席間克勤與女友齊飲紅酒之餘，更不時夾餸給對方及未來外父和外母享用。克勤近日榮升舅父，他坦言希望四十歲前生仔。
李克勤昨日三十八歲生日，他日前跟歌迷預祝生日，收到歌迷送贈一雙繪有其肖像的波鞋，克勤笑說：「畫得幾神似，不過唔通我踩住自己出街咩？都係留喺屋企留念，況且生日流流送鞋，真係激死！下次見要回番封利是畀嗰位歌迷當回禮，攞番個意頭。」
問克勤何時結婚？他說：「過埋演唱會先，今次真係會好快，因為我想生仔，兩個月前妹妹生咗個仔，我榮升舅父，加快想結婚嘅念頭，希望四十歲前生，所以要嗱嗱聲，好在平日有做運動，都ＯＫ㗎！」
孝敬未來外母
而克勤前日傍晚七時許收工後，乘坐保母車前往西貢通記海鮮野味酒家，會合女友盧淑儀及其胞妹、父母和友人等，齊擦海鮮餐慶祝生日。
壽星仔抵埗後與女友家人打過招呼，沒多久他發現有記者在場，連忙步出酒家向記者笑說：「你哋唔好走入嚟影呀，好唔好？佢哋係圈外人，食餐飯啫！」此時記者祝克勤生日快樂，他又笑着強調：「都係朋友食吓飯，冇乜特別，你哋真係唔好衝入嚟呀！」記者亦合作地於食肆門外等候。
現場所見，平日滴酒不沾的克勤，於生日的大日子與女友齊歎紅酒，雖然是壽星仔，但他亦不忘細心地夾餸給女友及未來外父外母，難怪盧淑儀的笑容比男友還要多，全程笑到合不攏嘴。
愛心炒飯送暖
由於食肆位置近海邊，前晚天氣寒冷，席間克勤見記者在街上吹風，便主動走出酒家門外友善地說：「出面好凍呀，不如入嚟食碗飯啦，入嚟唔好影相就得。」記者最終婉拒克勤好意，於是他折返酒家，特別點了一碟龍蝦炒飯，並親自把炒飯分成幾碗，拿給記者品嘗。食肆侍應則說：「克勤都嗌晒餸啦，都奇怪佢做乜無端端嗌多碟炒飯，佢真係幾好喎！」
到晚上近十一時，克勤與女友一家用膳完畢，因喝酒而臉泛紅霞的盧淑儀與家人先行步出食肆，克勤與老闆娘寒暄幾句後尾隨離開，並由女友充當柴可夫，駕着以她與克勤聯名擁有的公司所購入的平治房車返回西貢愛巢。
據知盧淑儀前日下午四時已致電到酒家訂枱，傍晚六時多抵達，先行揀海鮮及點菜，還特別訂製壽包，酒家老闆娘雖未肯透露克勤的餐單，但她笑說：「總之佢食嘅全部係靚嘢啦！」而昨天克勤不用開工，故可跟女友及家人齊度快樂生辰。
採訪、攝影：娛樂突發組
