陳敏之家中飼養了被譽為貴族貓的長毛安哥拉貓「陳鴨仔」，她謂愛貓起初晚晚叫春，令家人無法入睡，所以在貓咪兩歲時替牠做了閹割手術。敏之又謂愛貓既喜歡瞓梳化睇電視，又愛吃新鮮雞肉，享盡貴族生活！
陳敏之飼養的貓咪長毛安哥拉貓（TurkishAngora）被譽為土耳其貴族貓，屬最古老貓種之一。敏之的寶貝貓現年四歲，中文名叫陳鴨仔，洋名Edison，與陳冠希的英文名一樣，認真搞笑！
養貓皮費貴
敏之愛貓鴨仔具一般的土耳其貴族貓特性，難怪主人大歎養牠皮費貴，敏之日前抱着愛貓在將軍澳拍照時說：「平日一個月只要沖一次涼，冬天就要兩個月一次，次次都要揸車送佢去。鴨仔又好大食喎，一日食三餐，新鮮雞肉係佢嘅至愛，所以養佢都幾重皮費㗎，得閒重要同佢梳吓毛。」
敏之續說：「鴨仔有時會坐喺梳化睇電視，同人一樣坐喺度，兩隻手吊高，用個patpat坐，好搞笑㗎。我本來買咗間屋畀佢，膠屋、帳幕、豹紋屋，乜嘢都買過，佢又唔鍾意，淨係鍾意瞓梳化，夏天先瞓地下，因為地下鋪雲石，會涼好多。」
扮狗看門口
提起鴨仔的逗人怪招，敏之不禁笑說：「佢扮晒嘢，我哋邊個返屋企，佢都用個頭猛咁搞人哋隻腳，話你知佢要食嘢，跟住就跳去廚房，不過佢可能啱啱食完嘢，佢好機靈，成日呃飯食，你唔畀嘢佢食，佢咪成隻死貓眼咁望住你囉。」
其實鴨仔具有貴族貓種的高傲及忠心個性，敏之說：「佢好有性格㗎，唔係係人都理，重好高傲㖭。雖然佢係一隻貓，不過好似狗咁，對主人好忠心，重識得看門口㖭。」
採訪：朱倬誼 攝影：陳偉權
