今個星期可算是全年賽馬嘅高潮，周三跑國際騎師賽，周六拍賣新馬，而周日為戲肉跑國際賽。好多老友都同趙飛雲一樣，暫時只係心中有馬，尤其關心「精英大師」能否及時操起，星期日再度為港爭光。
日經指數上周已超越港股，昨日先跌後升129點，收15551，進一步拋離恒指，為早前敗於「精英大師」蹄下的日本馬，報咗一箭之仇，而港股昨日走勢有啲呆滯，好似參加完大遊行腳軟軟咁嘅款，對日股升跌反應唔大，全日波幅僅64點，最後收15158，跌41點。
趙飛雲其實預期恒指昨日有機會下試15130-15100水平，並準備吼位炒轉滙控C輪，但日股跌唔落，恒指跌至15145已企穩，而滙控（005）雖以全日低位125.30元收市，但跟心目中的124.80-125元仍有些少距離，所以冇郁手買滙控C輪4907。
4907昨跌2.5%，收0.39元。假如其他因素如引伸波幅等不變，理論上滙控跌至124.80-125元水平，4907應跌進0.355-0.37元區域，可作為買入參考價。
駿威挑戰50日線
東風（489）將於明日上市，管理層表示公開發售部份獲兩倍超購，而國際配售部份則獲7倍超購，招股PE6.5倍，定價1.60元，看來有水位炒上。
昨日汽車股亦見造好，駿威（203）升2%，收2.525元。技術上，駿威再挑戰50日線阻力2.525元，早前升至此水平突見大行狂質，不知是何原因？今日再觀望試關，若先回吐，見20日線2.45元守得穩，會小注買入短炒。駿威現價往績PE8.8倍，預測9.1倍，較東風為高，但所生產的是日本本田汽車，名牌享較高評價亦屬合理。
趙飛雲