新鴻基金融成立35年，係香港歷史最耐嘅證券經紀行之一，開業時得６個員工，家吓就有成850人，託管既資產超過250億元。為慶祝生日，噚日專登喺港麗開酒會，請咗百幾二百個嘉賓，公司主席狄亞法同埋執行董事唐登，一齊開香檳切蛋糕，重喺室內放小型煙花，跟住又請嚟幾個小朋友上台演奏，場面好鬼熱鬧。
唐登同華華講，今年花紅就一定唔少得，人工都有得加，幅度同市場差唔多，事關好多行家搶人，要諗吓計仔留住員工。佢又話，除咗證券之外，亦會諗下新產品同服務，好似基金咁，目標係每年盈利有15%增幅。
新記可以話係行內少林寺，到賀嘅嘉賓當中，唔少曾經喺新鴻基做過，好似電盈副主席蘇澤光、金匯主席馮家彬、葉黎成；另外黃保欣、東亞李民僑、結好洪漢文、鷹君羅旭瑞、新濠何猷龍、位元堂鄧清河、慶豐金陳發柱個仔陳其志，都有畀面到場。
噚晚走三場嘅馬時亨，到場逗留咗20分鐘，就趕住去下一場；舊臣子蘇澤光就姍姍來遲，幾乎係全場最遲現身嘅一個，到場第一時間搵主人家寒暄兩句影幾張相，留咗唔夠5分鐘就走，走得咁急去邊？咪又係趕第2場囉！咁忙都到一到，都算幾念舊。
李華華